بوح صلاح العرجاني
اقول و كفوف الفكر حاتميه
لا بارك الله في ردي الاشاوير
معي من لسان الضمير الوصيه
شاعر و لا اصدق كلام الشواعير
ماني تبع لو تطغي الاغلبيه
و لا اصدق راي من دون تبرير
فالشعر ما اقدر سوى الشاعريه
و الحكم يبقى دايماً للجماهير
مهما تكون الذائقه فوضويه
المبدع لحاله يعرف المعايير
من لا قدر يرضي جميع البريه
يرضى على نفسه على اقل تقدير
لو تستر الاعذار وجه الخطيه
ما للرجل لا من تردى معاذير
فرق النفوس الطيبه و الرديه
ما يعرف الا فـ الليال المعاسير
على اي حال المسأله مبدئيه
لو ان بعض الاعراف تحتاج تغيير
احكامنا سهله و لا منطقيه
و افكارنا دايم تجي دون تفكير
مع الخيال نحارب الواقعيه
و عقولنا ما تفهم الا الاساطير
اهم شي تكون راعي حميّه
و ما تفرق ان كانت على شر او خير
للحين فينا غلطه الجاهليه
نمجد انفسنا و نستحقر الغير
دايم نحسب المرجله عنصريه
و العنصريه غير و المرجله غير
صح الله كل مافيه