قلب يحبك وأصبح اليوم مطعون
حبيت غيري وعن هوانا تخليت
وأول حلفت وقلت عزاه مااخون
الله وأكبر ياحبيبي .. تناسيت
حب جمعنا وأغلب الناس يدرون
أول خفوقي بالمحبه لكم بيت
واليوم بأشباح الحزن صار مسكون
كم مرة في تالي الليل ونيت
وكن الحشا في داخله جرح وطعون
من ر مابي ياعرب قمت هليت
دمعي وقلبك داخل العين مسجون
وان شفت عذالي على طول سويت
نفسي سعيد .. وداخلي حزن مكنون
أول .. تبادلني الغلا . ماتغليت
واليوم عندك يرخص الحب ويهون
مدري زعل ياصاحبي يومك ابطيت
عن صاحب يحفظ لك الحب ويصون
ابشر خفوقي قد نساكم ولاقيت
شخص وفي وصادق الحب مزيون
مليت تعذيبك وانا منك .. مليت
وشلون اسامح جارح القلب وشلون
تدري وش اللي فيك انا صدق حبيت
ويمكن عشانه صرت لك حيل ممنون
اني كتبت الشعر عقبك ورديت
واصبحت اكتب حزن والناس يقرون